AZƏRBAYCAN » İQTİSADİYYAT
09 Aprel 2019, 14:15 (GMT +4)

“Azəriqaz” abonentlərə müraciət edib

Bakı, 9 aprel, SalamNews“Azəriqaz” İstehsalat Birliyi abonentlərə müraciət edib.

Birliyin ictimaiyyətlə əlaqələr şöbəsindən SalamNews-a verilən məlumata görə, son günlər Bakının müxtəlif ünvanlarında, əsasən də Yasamal rayonu ərazisində özünü “Azəriqaz”ın əməkdaşı kimi təqdim edən şəxs və ya şəxslər mənzillərdə quraşdırılmış smart-kart tipli qaz sayğaclarının üzərinə vurulmuş xüsusi nömrəli plombun yenilənməsi, batareyasının dəyişdirilməsi və ya smart-kartların “vaxtının keçməsi” kimi məsələləri bildirərək həmin “problemlərin” aradan qaldırılması üçün vətəndaşlardan müəyyən miqdarda pul tələb edir, eləcə də inandırıcı olması üçün qeyri qanuni akt tərtib edərək abonentlərə təqdim edirlər.

“Bununla bağlı istehlakçıların nəzərinə çatdırırıq ki, birliyin işçiləri mənzillərdə yerləşən qaz sayğaclarına profilaktik baxış və xidmət göstərəcəyi zaman “Azəriqaz”ın əməkdaşı olduğunu təstiq edən xidməti vəsiqə tələb edilməlidir. Həmçinin onlar öz xidməti vəsiqələrini təqdim etdikdən sonra yerlərdə göstərdikləri bütün xidmətlər ödənişsizdir və tərtib etdikləri xüsusi nömrəli aktlar isə sarı, qırmızı və göy rəngdə olmaqla üç nüsxədən ibarət tərtib olunaraq qırmızı rəngli akt abonentə təqdim edilir. Bir daha bildiririk ki, sadalanan qeyri qanuni hallarla rastlaşan vətəndaşlar yaşadıqları ərazi üzrə müvafiq polis bölməsinə müraciət etməlidirlər”, - deyə məlumatda qeyd olunur.