DÜNYA » SİYASƏT
01 Oktyabr 2019, 13:01 (GMT +4)

İran Məhkəməsi prezident Ruhaninin qardaşını 5 il həbsə məhkum edib

Bakı, 1 oktyabr, SalamNews, B.Samid. İran Məhkəməsi Həsən Ruhaninin qardaşı Hüseyn Firudinə 5 il həbs cəzası kəsib.

SalamNews FarsNews-a istinadla xəbər verir ki, bu barədə İranın Məhkəmə Hakimiyyətinin mətbuat xidməti məlumat yayıb.

Bildirilib ki, korrupsiyada və çirkli pulların yuyulmasında ittiham edilən və məhkəmə işi iki ildir davam edən Hüseyn Firudin 5 il azadlıqdan məhrum edilib.

Qeyd edək ki, Hüseyn Firudin prezident Həsən Ruhaninin köməkçisi, XİN rəhbəri Məhəmməd Cavad Zərifin müşaviri, İranın Malayziyada sabiq səfiri və sair postlara işləyib.