AZƏRBAYCAN » İQTİSADİYYAT
28 Oktyabr 2019, 18:15 (GMT +4)

DGK bəzi KİV-də yayılan məlumatlara rəsmi aydınlıq gətirib

Bakı, 28 oktyabr, SalamNews. Bəzi kütləvi informasiya vasitələrində və sosial şəbəkələrdə toxumluq kartofun gömrük orqanları tərəfindən ölkəyə buraxılmaması ilə bağlı həqiqətə uyğun olmayan məlumatlar yayılıb.

DGK Mətbuat və İctimaiyyətlə Əlaqələr İdarəsindən SalamNews-a verilən məlumata görə, Dövlət Gömrük Komitəsi bildirir ki, qüvvədə olan qanunvericiliyə əsasən mart, aprel, may, sentyabr, oktyabr və noyabr aylarında ölkəyə toxumluq kartofun idxalı gömrük rüsumlarından azad olunmaqla həyata keçirilir.

Bu güzəştlərdən istifadə etməklə gömrük ödənişlərindən yayınmaq istəyən bəzi işbazlar toxumluq adı altında digər kartof məhsulunun idxalına cəhd göstərirlər. Gömrük orqanları da bu kimi halların qarşısının alınması üçün zəruri tədbirlər həyata keçirir. Toxumluq kartofun ölkəyə buraxılmaması ilə bağlı həqiqətə uyğun olmayan məlumatlar da məhz həmin işbazlar tərəfindən məqsədli şəkildə yayımlanır.

Dövlət Gömrük Komitəsi bildirir ki, toxumluq və digər kartof məhsulunun ölkəyə idxalında hər hansı məhdudiyyət yoxdur və qanunvericiliyə uyğun şəkildə, qısa vaxt ərzində rəsmiləşdirilərək sahiblərinə təhvil verilir.