AZƏRBAYCAN » İQTİSADİYYAT
07 May 2020, 12:31 (GMT +4)

"Zülfi Hacıyev"” kran gəmisi əsaslı təmir edilib

Bakı, 7 may, SalamNews.“Azərbaycan Xəzər Dəniz Gəmiçiliyi” QSC-nin (ASCO) Xəzər Dəniz Neft Donanmasının balansında olan “Zülfi Hacıyev” kran gəmisinin “Bibiheybət” Gəmi Təmiri Zavodunda əsaslı təmir işləri başa çatıb.

ASCO-dan SalamNews-a verilən məlumata görə, təmir müddətində kranın burazlarının hərəkət etdiyi bütün istiqamətləndirici halqaları çıxarılıb və əsaslı təmir olunduqdan sonra yerlərinə quraşdırılıb. Baş mühərriklər, nasoslar, boru sistemləri, sanitar qovşaqlar, elektrik mühərriklərinin cari təmir işləri aparılıb.

Məlumata əsasən, “Zülfi Hacıyev” gəmisi tərsanəyə qaldırılaraq gövdənin sualtı və suüstü hissəsində zədələnmiş sahələr dəyişdirilib, gəmi üzrə rəngləmə işləri görülüb. Bununla belə, hərəkət-sükan kompleksi, dib-yan armaturları, protektor qurğularının təmiri də yerinə yetirilib.

İşlər başa çatdıqdan sonra gəminin 100 tonluq yükqaldırma qabiliyyətinə malik kran qurğusunun sınaq işləri aparılıb və uğurla başa çatıb. Bundan sonra mexanizm və elektrik avadanlıqlarının yoxlanılması məqsədilə gəmi dəniz sınağına çıxarılıb. Müvəffəqiyyətlə başa çatan dəniz sınaq işlərindən sonra gəmi Registr təsnifatı nümayəndələrinə təhvil verilib.

Qeyd edək ki, “Zülfi Hacıyev” kran gəmisinin uzunluğu 98,55 metr, eni isə 17 metrdir.