Qulu Məhərrəmli: "Reket jurnalistika" həm jurnalistika adına, həm də hüquq adına ləkədir

Bakı, 3 dekabr, SalamNews, A.İsgəndərova. ""Reket jurnalistikası" əslində jurnalistika faktı deyil. Onlar cəmiyyət üçün təhlükəli məlumatlar yayan, vətəndaşları mənəvi cəhətdən zədələyən, zorla, hədə yolu ilə insanlardan pul qoparmağa çalışan saxtakarlardır”.

Bu fikirləri SalamNews-a açıqlamasında tanınmış jurnalist, teleradio tarixinin tədqiqatçısı, professor Qulu Məhərrəmli bildirib.

Q.Məhərrəmlinin sözlərinə görə, "reket jurnalistlər"ə qarşı tədbir görülməlidir. Bu tədbiri də Mətbuat Şurası deyil, hüquq mühafizə orqanları görməlidir.

"İnsanlar var ki, artıq "reket jurnalistikasını" pul qazanmağın əlverişli yolu kimi qəbul edir. Mən ona görə də dövlət qrumlarının, hakimiyyətin reketlərə qarşı mübarizəsini dəstəkləyirəm. Onlar cəmiyyətin alaq otlarıdır. Bunları kökündən qopardıb atmaq lazımdır. Onlar həm jurnalistika adına, həm də hüquq adına ləkədir. Buna görə bunlara qarşı mübarizə aparmaq lazımdır. Amma heç bir halda normal tənqid yazan saytın, qəzetin bu bahanə ilə fəaliyyəti məhdudlaşdırıla bilməz. "Reket jurnalistlər" bəlidir. Cəmiyyətdə bunlar haqqında təsəvvür var. Onlara qarşı mübarizə aparmağı mən təqdirəlayiq hesab edirəm”, - deyə o bildirib.

Bu barədə SalamNews-a fikirlərini bildirən Bakı Dövlət Universitetinin (BDU) müəllimi Zeynal Məmmədlinin sözlərinə görə, "Reket jurnalistika"nın ümumiyyətlə mediaya aidiyyəti yoxdur: "Onlar yazmırlar, anonim informasiyalar hazırlayıb insanları hədələyirlər. Onlar mütəşəkkil, kriminal qruplaşma və ya jurnalist də ola bilərlər. Mən bu məsələni medianın problemi hesab etmirəm. Çünki həmin jurnalistika cəmiyyətdə heç bir ictimai rəy yarada bilməzlər. Cani nə qədər təhlükəlidirsə, bu cür jurnalistlər də cəmiyyət üçün o qədər təhlükəlidir və bunların hər ikisi də kriminal elementlərdir. Həqiqi jurnalistika ilə "reket jurnalistikası"nı bir-birindən ayırmaq lazımdır. Cinayətkarlığa "reket jurnalistika"sı adını qoymaq yanlışdır”.