Mübariz Qurbanlı: "İslam Həmrəylik İli" ilə əlaqədar tədbirlər planı üzərində iş gedir

Bakı, 20 yanvar, SalamNews, A.Bayramova. Azərbaycan Prezidentinin sərəncamı ilə bu il "İslam Həmrəylik İli" elan edilib. "İslam Həmrəylik İli" ilə əlaqədar Tədbirlər Planı üzərində işlənilir.

SalamNews xəbər verir ki, bunu jurnalistlərə açıqlamasında Azərbaycan Dini Qurumlarla İş üzrə Dövlət Komitəsinin sədri Mübariz Qurbanlı bildirib.

Onun sözlərinə görə, baş nazirin müavini Əli Əhmədovun yanında ayrı-ayrı qurumların rəhbərlərinin müşavirəsi keçirilib: "Hazırda hər bir qurum tərəfindən "İslam Həmrəylik İli" ilə bağlı təkliflər göndərilir. Bu təkliflər toplanacaq və konkret təkliflər üzərində işləndikdən sonra Azərbaycan Prezidentinə təqdim ediləcək.

Daha sonra isə Tədbirlər Planı təsdiq ediləcək. Plan təsdiq edildikdən sonra bu plan üzrə "İslam Həmrəylik İli" çərçivəsində həm Azərbaycanda, həm də Azərbaycandan kənarda müxtəlif tədbirlər həyata keçiriləcək. Həmin tədbirlər planında bütün sahələr nəzərdə tutulur. İslam Həmrəyliyi bütün istiqamətləri əhatə edəcək. Eyni zamanda ayrı-ayrı islam ölkələri arasında İslam təşkilatları, İslam qurumları çərçivəsində fəaliyyəti, o cümlədən İslam adı altında yaradılan radikal quruplara qarşı birgə mübarizənin Koordinasiya olunması kimi məsələlər burada öz əksini tapacaq. Ən mühüm tədbirlərin ilki Bakıda keçiriləcək. İSESCO, İslam Əməkdaşlıq Təşkilatı (İƏT) çərçivəsində tədbirlər keçirilməsi nəzərdə tutulur".