Qurban bayramı ilə bağlı atəşkəs təklifi Liviyada müsbət qarşılanmayıb - Qarşıdurmalar davam edir

Bakı, 10 avqust, SalamNews, B.Samid. BMT-nin Liviya münaqişəsi üzrə müsəlman təmsiliçisi Qassan Səlamənin təklifinə baxmayaraq, ölkənin əksər hissəsini nəzarətdə saxlayan Xəlifə Haftarın ordusu Qurban bayramı günlərində atəşkəsin bərpası təklifinə müsbət cavab verməyib.

SalamNews  əl-Ərəbiyyə telekanalına istinadla xəbər verir ki, general Xəlifə Haftarın başçılıq etdiyi "Liviya Milli Ordusu" qurbanlıqla bağlı atəşkəsin bərpası təklifinə müsbət cavab verməyib.

"Liviya Milli Ordusu" mənfi cavabın səbəbini açıqlamayıb.

Paytaxt Tripoli və ətrafı nəzarətdə saxlayan "Milli Barışqı Hökuməti" BMT təmsilçisi Qassan Səlamənin atəşkəs təklifinə müsbət cavab versə də hər iki tərəf son günlərdə qarşılıqlı hücum sərgiləyiblər.

Xatırladaq ki, cari ilin aprel ayının əvvəlindən General Xəlifə Həftərin başçılıq etdiyi "Liviya Milli Ordusu" (bu qüvvələr paytaxt Tripoli və bəzi sahil rayonları istisna olmaqla ölkənin əksər hissəsini nəzarətdə saxlayır) paytaxt Tripoli istiqamətdə hücuma başlayıb. Beynəlxalq ictimaiyyətin dəstəklədiyi "Milli Barışıq Hökuməti" general Xəlifə Haftarın ordusunun qarşısını almaq üçün bir neçə dəfə BMT TŞ-a şikayət edib.