İranda Qasim Süleymaninin silahdaşlarından biri terror edilib

Bakı, 22 Yanvar,  SalamNews, B.Samid. İranın Bəsic Təşkilatının Xuzestan əyalətinin Şadeqan rayonunun Darxuveyn şəhəri üzrə nümayəndəsi terror edilib.

SalamNews Tasnim-ə istinadla xəbər verir ki, Bəsic Təşkilatının Darxuveyn şəhəri üzrə nümayəndəsi Əbdül-Hüseyn Məcdumi ötən axşam naməlum şəxslər tərəfindən terror edilib.

Məlumata görə, evinin həyətinə daxil olan şəxslər Bəsic nümayəndəsinə 4 dəfə atəş açıblar. O aldığı yaralardan həyatını itirib.

İran mətbuatının məlumatına görə, Əbdül-Hüseyn Məcdumi Suriya və İraqda İŞİD-lə döyüşlərdə fəal iştirak edib və Qasim Süleymaninin silahdaşlarından hesab edilirdi.

Bəsicin Darxuveyn şəhəri üzrə nümayəndəsinin terror edilməsini hələ heç bir qruplaşma üzərinə götürməyib.