Suriyada kənd sakinləri ABŞ hərbi karvanının bölgəyə girməsinin qarşısını alıblar (VİDEO)

Bakı, 13 may, SalamNews, B.Samid. Suriyanın şimal-şərqində kürd bölmələrinin nəzarətində qalan Dəşişa və əl-Qahirə kəndlərinin sakinləri ABŞ hərbi karvanının kəndlərə girməsinə mane olublar.

SalamNews xəbər verir ki, bu barədə kənd sakinləri sosial şəbəkələrdə görüntülər yerləşdiriblər.

Görüntülərdən bəlli edilir ki, Həsəka əyalətinin (Suriyanın şimal-şərqi) Təll-Təmr rayonunun Dəşişa və əl-Qahirə kəndlərinin sakinləri bölgəyə daxil olmaq istəyən ABŞ hərbi karvanının qarşısını alır.

Daha sonra ABŞ hərbi karvanı geri qayıtmağa və ərazini tərk etməyə məcbur qalır.

Qeyd edək ki, ABŞ qüvvələri Suriyada 20-ə yaxın hərbi qərargahda yerləşiblər. Sayı altı yüz civarında olan ABŞ qüvvələri əsasən Fəratın şərqində separatçı kürd bölmələrinin nəzarətindəki ərazilərdə və İordaniya ilə sərhəddə ət-Tənif səhra bölgəsindədir.