İranda koronavirusa yoluxmada rekord rəqəm qeydə alınıb

Bakı 25 noyabr, SalamNews. B.Samid. İranda son sutkada 13,843 nəfərin koronavirusa yoluxması qeydə alınıb və bu rəqəm pandemiya başlayandan indiyədək gündəlik qeydə alınan ən yuxarı hesab edilir.

SalamNews İSNA-a istinadla xəbər verir ki, bunu İranın Səhiyyə Nazirliyinin mətbuat katibi Sima Sadat-Lari deyib.

İran rəsmisi bildirib ki, son sutkada ölkədə 13,843 nəfərin koronavirusa yoluxması qeydə alınıb və bu rəqəm ümumilikdə 894,385-ə çatıb.

Əlavə edilib ki, son 24 saat ərzində İranda 469 nəfərin koronavirusdan ölümü qeydə alınıb və bu rəqəm ümumilikdə 46,207-ə çatıb.

İranda Covid-19 virusu ilə bağlı 6 milyona yaxın insan testlərdən keçib və testlərin cavabı müsbət olan xəstələrdən 626 mini sağalıb.