ABŞ Suriyada İranın dəstəklədiyi qüvvələrə hava zərbələri endirdiyini bildirib

Bakı, 26 fevral, SalamNews, B.Samid. ABŞ Müdafiə Nazirliyi prezident Co Baydenin razılığı ilə Suriya-İraq sərhədində İrana bağlı olan iraqlı hərbi qüvvələrə hava zərbələri endirdiyini bildirib.

SalamNews Sputnik.Arabic-ə istinadla xəbər verir ki, bu barədə Pentaqon bəyanat verib.

Bildirilib ki, “Suriyanın şərqində İranın dəstəklədiyi birləşmələrə hava zərbələrinin endirilməsi, ABŞ-ın İraqdakı mövqelərinə hücuma cavab olaraq həyata keçirilib.”

Əlavə edilib ki, hava zərbələri "Kətaib Hizbullah" və "Kətaib Seyyiduş-Şühəda" kimi qrupların istifadə etdiyi infrastrukturaya endirilib.

Qeyd edək ki, qarşı tərəf hələ bu hücumlara münasibət bildirməyib və hücum nəticəsində xəsarətlərin olub-olmaması hələ məlum deyil.