Ərəb Dövlətləri Liqası Ukraynadakı vəziyyətlə bağlı təcili iclas keçirir

Bakı, 28 fevral, SalamNews, B.Samid. Ərəb Dövlətləri Liqası Ukraynadakı mövcud vəziyyəti müzakirə etmək üçün Misirin tələbi ilə bazar ertəsi Küveytin sədrliyi ilə daimi nümayəndələr səviyyəsində fövqəladə iclas keçirməyə qərar verib.

SalamNews Səudiyyə Ərəbistanın dövlət xəbər agentliyi VAS-a istinadla xəbər verir ki, Ərəb Liqasının baş katibinin köməkçisi, səfir Həssam Zaki bildirib ki, “Küveytin xarici işlər nazirinin Ərəb Dünyası Məsələləri üzrə köməkçisi Nasir əl-Qəhtaninin başçılığı ilə daimi nümayəndələr səviyyəsində Liqa Şurasının fövqəladə sessiyasının keçirilməsi qərara alınıb.

Zəki Küveyt, İordaniya və bir sıra ərəb ölkələrinin Misirin tələbinə dəstək verdiyini qeyd edərək, vurğulayıb ki, rəsmi Qahirənin dəvəti ilə Ərəb Liqası Şurasının bu fövqəladə iclasının Ukraynada baş verənləri müzakirə etmək üçün keçirilməsi razılaşdırılıb.

Ərəb Dövlətləri Liqası ötən gün səhər saatlarında Ərəb Liqasının Baş Katibliyi, Misir və Küveyt arasında Qahirənin çağırdığı fövqəladə iclasın keçirilməsi üçün təklif olunan tarixlə bağlı məsləhətləşmələr apardığını elan etmişdi.