Qanun pozan sahibkarlara 700 min manatdan çox maliyyə sanksiyası tətbiq edilib

Bakı, 1 mart, SalamNews. 2021-ci ildə İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti sahibkarlar barəsində ümumilikdə 710 min manat məbləğində sanksiyalar tətbiq edib.

SalamNews-un məlumatına görə, bunu xidmətin rəhbəri Məmməd Abbasbəyli 2021-ci ilin yekunları ilə bağlı mətbuat konfransında deyib.

Onun sözlərinə görə, ötən il antiinhisar qanunvericiliyinin pozulması ilə bağlı 22 işə baxılıb.

"İşlər müxtəlif fəaliyyət sahələrinə, o cümlədən icbari tibbi sığorta sahəsinə aid olub. Nəticədə, 2021-ci ildə qanunları pozan şəxslərə 710 min manat məbləğində maliyyə sanksiyası tətbiq edilib", - deyə o bildirib.

M.Abbasbəyli əlavə edib ki, hesabat dövründə fəaliyyətin icrası qaydalarının pozulması ilə bağlı 178 müraciət qeydə alınıb.

"Bunlardan 15 müraciət reklam sahəsində, 96 müraciət rəqabət sahəsində qeydə alınıb", - xidmət rəhbəri deyib.