Ərəb Dövlətləri Liqası dünya ictimaiyyətini İsrailin əl-Əqsadakı basqınlarını durdurmağa çağırıb

Bakı, 22 aprel, SalamNews, B.Samid. Ərəb Dövlətləri Liqası İsrail qüvvələrinin əl-Əqsa məscidinə basqınlarını pisləyib və dünya ictimaiyyətini bu siyasəti durdurmağa çağırıb.

SalamNews Əlcəzirəyə istinadla xəbər verir ki, İsrailin Qüdsdəki qeyri-qanuni siyasətləri ilə mübarizə aparmaq üçün beynəlxalq fəaliyyətə cavabdeh olan “Ərəb Nazirlər Komitəsi” dünən, cümə axşamı İordaniya paytaxtında keçirdiyi fövqəladə iclasda İsrailin Əl-Əqsa məscidinə basqınlarını artırmasını pisləyib və “gərginliyi alovlandırmaq” mövzusunda xəbərdarlıq edib.

Ərəb Dövlətləri Liqasının baş katibi Əhməd Əbül-Qayt toplantının nəticələrini reallaşdırmaq üçün dərhal hərəkətə keçəcəyini bildirib.

Eləcə də İordaniya Kralı II Abdullah “Ərəb Nazirlər Komitəsi”nin üzvləri ilə görüşündə, Qüdsdəki gərginliyi dayandırmaq üçün ərəblərin səylərini birləşdirməyin və koordinasiyanın gücləndirilməsinin vacibliyini vurğulayıb.