Ərəb Dövlətləri Liqası Liviyada siyasi böhranın davam etməsi barədə xəbərdarlıq edib

Bakı, 4 iyul, SalamNews, B.Samid. “Liviyada siyasi proseslərin dalana dirənməsi ölkənin təhlükəsizliyi və sabitliyinə acı təsirləri olacaq.”

SalamNews RT.Arabic-ə istinadən xəbər verir ki, bunu Ərəb Dövlətləri Liqasının baş katibi Əhməd Əbulğayt deyib.

Liviyada konstitusiya layihəsilə bağlı razılığın gecikməsinə münasibət bildirən ƏDL baş katibi bu ölkədə siyasi proseslərin dalana dirənməsi və təhlükəsizliyin zərbə görə biləcəyilə bağlı xəbərdarlıq edib.

Qeyd edək ki, iki gün öncə qəzəblə etirazçılar Liviyanın Tobruq şəhərində parlament binasına hücum edərək, onun bloklarından birini yandırıblar.

Hazırda Liviyada iki paralel hökumətin hakimiyyət uğrunda mübarizəsi səbəbindən yaranan gərgin siyasi vəziyyət nəticəsində iqtisadi böhran yaşanır. Bunlardan biri martın əvvəlində Parlamentin səs verdiyi Fəthi Başağa hökuməti, digər isə mərkəzi qərargahları paytaxt Tripolidə olan Əbdülhəmid Dbeybanin rəhbərlik etdiyi “Milli Birlik Hökuməti” dir. Dbeyba hakimiyyəti parlament vasitəsilə gələn hökumətə təhvil verməkdən imtina edir və seçkilərin keçirilməsini tələb edir.