Ərəb Liqası: İsrailin addımları Qüdsdə dini qarşıdurmanı alovlandırmaq təhlükəsi yaradır

Bakı, 18 iyul, SalamNews, B.Samid. Ərəb Dövlətləri Liqasının baş katibi Əhməd Əbu əl-Qayt xəbərdarlıq edərək bildirib ki, İsrailin addımları işğal altındakı Qüds şəhərində ciddi dini qarşıdurmaların alovlanması təhlükəsi yaradır.

SalamNews xəbər verir ki, ƏDL-nın baş katibi bunu bazar ertəsi Qahirədə Baş Katibliyin mənzil-qərargahında Fələstin Muxtariyyətinin Qüds işləri naziri Fadi əl-Hədəmi ilə görüşü zamanı deyib.

Bu müzakirələrdə Qüds şəhərindəki son vəziyyət müzakirə edilib.

Bu müzakirələr İsrail qüvvələrinin İslam və Xristian ziyarətgahlarına, eləcə də müsəlmanlara qarşı amansız hücumu fonunda aparılıb.

Fələstinli nazir İsrail hökumətinin Qüdsdə fələstinlilərin varlığına maneələr yaratması və fələstinlilərin kvartallarını yəhudi yaşayış massivləri ilə blokadaya alması cəhdlərindən danışıb.

O, ekstremist yəhudi qruplarının Müqəddəs əl-Əqsa məscidinə basqınlarının intensivləşməsi, habelə Məscidül-Əqsanın zaman və məkan baxımından bölünməsinə yönəlmiş İsrailin cəhdlərindən danışıb.

ƏDL baş katibi, siyasi, iqtisadi və mənəvi cəhətdən bütün mümkün vasitələrlə ərəblərin fələstinlilərin bu müqavimətinə dəstəyinin gücləndirilməsinin vacibliyini vurğulayıb.

O, Qüds məsələsinin hər bir ərəb və müsəlmanı narahat etdiyini və bu yükün təkcə fələstinlilərin üzərinə düşməməli olduğunu vurğulayaraq, İsrailin Qüdsdəki əməllərinin təhlükəli dini qarşıdurmaların alovlanması təhlükəsi yaratdığıni deyib.