İsrailin Qəzzaya hücumunda 15-i uşaq olmaqla həlak olanların sayı 43-ə çatıb

Bakı, 8 avqust, SalamNews, B.Samid. Son üç gündə İsrailin Qəzzanı bombalaması nəticəsində ölənlərin sayı 43-ə çatıb, yaralılar isə 300-ü keçib.

SalamNews Əlcəzirəyə istinadən xəbər verir ki, bu barədə Qəzzada səhiyyə mənbələri məlumat veriblər.

Bildirilib ki, İsrailin son üç gündə Qəzzaya təcavüzü nəticəsində ümumilikdə 43 nəfər həlak olub. Onların 15-i uşaq və səkkizi yaşlı insanlardır.

Bu hücumda 300-dən çox insan yaralanıb.

Məlumata görə Qəzzada “İslami Cihad” və digər hərəkatlar İsrailin nəzarətindəki ərazilərə 900-dən çox raket və mərmi atıblar. Cavab atəşi nəticəsində İsraildə 10 nəfərin yaralandığı və xəsarət aldığı və külli miqdarda maddi ziyanların qeydə alındığı bildirilir.

Əlcəzirənin məlumatına görə artıq tərəflər atəşkəsə razılıq veriblər.