ABŞ və İsveçrə dondurulmuş vəsaitlərdən Taliban hökumətinə 3,5 milyard dollar köçürmək qərarına gəlib

Bakı, 15 sentyabr, SalamNews, B.Samid. ABŞ və İsveçrə hökumətləri sabiq Əfqanıstan hökumətinin dondurulmuş 3,5 milyard dollarını “Taliban” hökumətinə vermək qərarına gəliblər.

SalamNews FransPress-ə istinadən xəbər verir ki, ABŞ Maliyyə Nazirliyi və Dövlət Departamenti birgə bəyanatda bildiriblər ki, fevral ayında dondurulmuş 7 milyard dollar vəsaiti olan “Əfqanıstan Mərkəzi Bankı” qaytarılacaq məbləğlərin saxlanılması və təyin edilmiş sahələrə doğru şəkildə sərf etməsi barədə təzminat verməlidir.

Əlavə edilib ki, 3.5 milyard dollar qədərində vəsaitin qeyri-qanuni fəaliyyətlərdə istifadəsinin qarşısını almaq üçün güclü təminat tədbirləri həyata keçirilib.

Qeyd edək ki, ABŞ hökuməti yerdə qalan 3.5 milyardı 11 sentyabr hadisələrinin qurbanlarını bəhanə edərək mənimsəyib. O zaman bir sıra dövlətlər bu addımı oğurluq adlandırmışdı.

Xatırladaq ki, Taliban 2021-ci ilin avqustunda ABŞ ordusunun geri çəkilməsindən sonra ölkəyə nəzarəti ələ keçirib. Bundan sonra Əfqanıstan üçün beynəlxalq maliyyələşdirmə dayandırılıb və ölkənin xaricdəki, əsasən də ABŞ-dakı milyardlarla dollarlıq aktivləri dondurulub.