Somalidə Əl-Şəbab qruplaşmasının 100-dən çox üzvü zərərsizləşdirilib

Bakı, 25 oktyabr, SalamNews, S.Bağırov. Somali hökumət qüvvələri beynəlxalq hərbi müttəfiqlərin dəstəyi ilə ölkənin mərkəzi hissəsində iki günlük əməliyyatlar zamanı 100-dən çox Əl-Şəbab döyüşçüsünü zərərsizləşdirib.

SalamNews Sputnik.Arabic-ə istinadən xəbər verir ki, bu barədə Somalinin İnformasiya, mədəniyyət və turizm nazirinin müavini Əbdürrəhman Ədalət açıqlama verib.

Bildirilib ki, “Şabeli əl-Vusta” əyalətində Əl-Şəbab komandirləri və onlara tabe silahlılara qarşı iki gün ərzində aparılan əməliyyatda qarşı tərəfin 100-dən çox üzvü zərərsizləşdirilib.

Şənbə günü başlayan əməliyyat çərçivəsində Əl-Şəbab komandirlərinin toplaşdığı bir obyekt hədəfə alınıb və burada Abdullah Əli Arale də daxil olmaqla 21 təhlükəli terrorçu öldürülüb.

Məlumata görə, təhlükəsizlik qüvvələri yerli əhaliyə hücum edən və sakinlərdən qeyri-qanuni rüsum və vergilər yığan Əl-Şəbab döyüşçülərini ölkədən çıxarmaq üçün həm hava, həm də quru əməliyyatlarını gücləndirəcəklərini bildiriblər.