Əməkdar rəssam Rəis Rəsulzadənin fərdi sərgisi açılıb

Bakı, 6 iyun, SalamNews, Ş.Nəzərli. Vəcihə Səmədova adına sərgi salonunda Əməkdar rəssam Rəis Rəsulzadənin fərdi sərgisi açılıb. SalamNews xəbər verir ki, sərgidə istedadlı rəssamın müxtəlif janrlarda 100-dən çox əsəri nümayiş olunur. Fırça ustasının mənzərə və portret əsərləri xüsusilə diqqət cəlb edir. Azərbaycan Xalq Cümhuriyyətinin banisi Məhəmməd Əmin Rəsulzadənin nəvəsi olan Rəis Rəsulzadə 1946-cı ildə ailəsinin sürgündə yaşadığı Alma-Ata vilayətinin Kirov qəsəbəsində anadan olub. 1969-cu ildə Ə.Əzimzadə adına Azərbaycan Dövlət Rəssamlıq Məktəbini, 1977-ci ildə Azərbaycan Dövlət Pedaqoji İnstitutunu bitirib. Azərbaycan Respublikasının Əməkdar rəssamı, Azərbaycan Siyasi Repressiya Qurbanları Assosiasiyasının sədri R.Rəsulzadənin 1976-cı ildən başlayaraq fərdi sərgiləri təşkil olunur və o, Beynəlxalq, Ümumittifaq və regional sərgilərində iştirak edir. Rəssamın fərdi sərgisi 10 gün davam edəcək. FOTO: Ş.Nəzərli